Eskola talde ezberdinetan antolatzen da adinaren arabera: Txikienentzako musika tailerra, ZariaTxiki kantu munduan hasten direnentzat, ZariaTxo hazten ari direnentzat, ZariaGaz nerabeentzat eta Zaria helduentzat. Talde bakoitzak kalitatezko musika guztientzat eskuragarri dagoen ingurune batean aurkitzen du bere lekua, lau urtetik aitzinera.

Zaria Koru Eskolak, bertzeak bertze, musika errenazentista, euskal folklorea, musikalak,  nazioarteko folklorea eta musika garaikidea biltzen dituen errepertorioa lantzen du. Gainera, Zaria nazioko eta nazioarteko abesbatzekin aktiboki lankidetzan aritzen da, Errenteriara kultura berriak ekartzeko eta bertako kantarien hazkunde pertsonala eta artistikoa sustatzeko helburuarekin. Lankidetza horiek Estatu Batuetara, Frantziara, Alemaniara eta Txekiako Errepublikara eraman gaituzte, bertzeak bertze.

Gure egitekoa pertsona bakoitzari bere ahots eta musika potentziala garatzen laguntzea da, diziplina, autoestimua, elkartasuna eta errespetua bezalako balioak sustatzen dituen giro batean.