Berako Udalak ekoiztua, Jose Luis Echechipiak zuzendu du
Bidasoaldeko organoen inguruko dokumentala egin du Jose Luis Echechipia Parisek (Iruñea, 1966), Berako Udalak sustatuta, eta Beran estreinatuko du heldu den larunbatean, arratsaldeko 20:00etan kultur etxean eginen den emanaldian. Dokumentala euskarazko eta gaztelaniazko bertsioetan egin da, eta larunbateko emanaldian gaztelaniazkoa ikusi ahal izanen da.
40 minutu inguruko dokumentala da, eta Bidasoaldeko organoen aberastasuna agerian paratzen du, organo horien inguruko hainbat protagonistari ahotsa ematearekin batera. Organo musika aditzearekin batera, dokumentalean parte hartu dute honako pertsona hauek: Josu Goia eta Agustin Arriola, Bera eta Lesakako organistak; Esteban Irusta, Lesakako organista ohia; Marijo Bergara, Berako Isidoro Fagoaga Udal Musika Eskolako zuzendaria; Esther Iñiguez beratar jatorriko organista; Aurelio Sagaseta iturendarra, musikan aditua; Marisol Perez, Lesakako abesbatzako zuzendaria; Helena Taberna, zine zuzendaria; eta Angel Illarramendi konpositorea.
Gidoiaz eta zuzendaritzaz Jose Luis Echechipia arduratu da. Jose Ignacio Zabaleta eta Montserrat Torrentekin ikasi zuen organoa jotzen. Irakasle aritua da, bertzeren artean Pablo Sarasate Kontserbatorioan, eta organista ezaguna da (egun Leireko organista). Hainbat ikerlan ere egin ditu. Aspaldidanikoa du Berako eta Bidasoaldeko organoekiko lotura eta atxikimendua, eta azkeneko urteotan, Berako organoaren zabalkunderako zein bere historia biltzeko lanetan laguntzaile izan da.
Alderdi teknikoaz Barañaingo Binario Estudio arduratu da, Txuma Huarte irudiaz eta editaiaz arduratu da, eta Carlos Solano beratarra argiztapenaz; eta offeko ahotsa Oscar Goikoetxea beratarrak paratu du.
Berako Udaleko Garapen Batzordeak Cederna-Garalurren LGP-PDR funtsen bidez (Europako Batasuneko Leader programak eta Nafarroako Gobernuak diruz lagundua) egin du bideoa, azkeneko urteotan Berako organoa balioan paratzeko lanen baitan. Ez da ahantzi behar, Berako organoa, 1895ean Aquilino Amezua y Jauregik eraiki zuela, eta egun Nafarroan dagoen organo erromantikorik onenatzat hartua dela. Nafarroako Gobernuak Intereseko Kultur Ondare izendatua du.