1872ko otsailaren zortzian Eugenio de Aviraneta hil zen eta urte bereko abenduaren hogeita zortzian Pio Baroja sortu zen.

Bata hil zela eta bertzea jaio zela 150 urte bete direnez, liburu hau idatzi dugu, eta liburu horren zati handi batean elkarrekin agertzen dira.

Bertzalde, Baroja eskolan nola aurkezten den ikusita, idazle honengana lehen aldiz hurbiltzen den norbait izaki triste eta bere baitan itxia zelako aurreiritziarekin hurbiltzen da. Liburu honetan kontrakoa frogatu nahi dugu. Irakurleak hiru zati desberdin izango ditu.

Lehenengoan, Pío Baroja, el hombre que vino del mar, gizon triste eta malenkoniatsuaren kondaira horrekin amaitzen lagundu nahi dugu eta, horretarako, Baroja bihotz sentibera eta distiratsua duen pertsona gisa agertzen zaigun testu batzuk aukeratu ditugu.

Bigarren zatia Memorias de un hombre de acción liburuaren laburpen nobelatua da. Presaka dabilen mundu honetan, ezertarako astirik ez dagoen honetan, testu honek Memoriak lanaren ideia globala izateko eta serie osoa irakurtzeko aukera emango digu. Barojak jarritako pertsonaia bat biziberritu dugu, eta, beharbada, sakabanatuta zeuden zati batzuk lotzen ditu.

Hirugarrenean, Barojaren poesiari buruz solastuko gara, eta haren poemen sorta bat agertuko da.