Eusko Label banakako aizkora txapelketako saioa jokatuko da bihar,  arratsaldeko 19:00etatik aitzinera Berako Eztegara pilotalekuan. Saio bikoitza izanen da, 23 urtez beheitiko eta 18 urtez beheitiko kategorietan.

23 urtez beheitikoan, final laurdenetako kanporaketa saioa izanen da. Zortzi aizkolari ariko dira finalerdietako lau txartelen bila: Oihan Larretxea beratarra, Ander Erasun aurtiztarra, Ruben Saralegi leitzarra, Arostegiko Julen Kañamares III, Otsagabiko Iker Vicente, Azpeitiko Mikel Larrañaga, Beizamako Eneko Otaño eta Segoviako Jon Rodriguez II.

18 urtez beheitiko gaztetxoen mailako lehen saioa izanen da Berakoa. Ligaxka moduan jokatuko da, multzo bakarrean. Beran Zigako Joxean Etxeberria II eta Arostegiko Oier Etxeberria II ariko dira aurrez aurre. Barakaldoko Julen Larrea III.ak atseden izanen du lehen jardunaldi honetan. Hiruek finalerdietarako bi txartelen bila lehiatuko dira.